Першыя крокі ў прафесіі Алесі Урбановіч

У жыцці кожнага маладога чалавека вельмі важнымі становяцца першыя крокі ў прафесіі. Толькі закончана вучоба, здаецца, у галаве так шмат ведаў. Але адна справа тэорыя, а зусім іншае — практыка. Шмат чаго залежыць і ад самога маладога работніка, ці праявіць сябе, ці будзе ў яго боку жаданне працаваць, а не проста адбыць патрэбны тэрмін. Таксама важную ролю ў станаўленні маладога спецыліста адыгрывае той калектыў, куды ён трапіць: як аднясуцца, ці заахвоцяць да работы, ці падтрымаюць у складаны момант. Адным словам, адаптацыя на новым працоўным месцы — працэс няпросты. Але для маладога спецыяліста Алесі Урбановіч, якая ў мінулым годзе пачала працаваць на свінакомплексе КУВСП «Гарадзец», здаецца, праблем ні з першым, ні з другім няма. І хоць у час вучобы на заатэхніка асноўная ўвага надавалася рабоце з буйнай рагатай жывёлай, склалася так, што працаваць па размеркаванні трапіла сюды, на свінакомплекс. Алесю гэты факт не засмуціў — у любой галіне усё роўна прафесію трэба спасцігаць на практыцы — і яна смела ўзялася за засваенне прафесіі.

— Пакуль трэба адпрацаваць прызначаныя два гады, — гаворыць яна пра планы на будучыню, — а там паглядзім. Працую брыгадзірам участка ўзнаўлення пад кіраўніцтвам вопытнага спецыяліста сваёй справы Ірыны Антонаўны Цішонак, ад якой атрымліваю ўсё неабходную падтрымку і парады. Падабаецца атмасфера ў калектыве, дзелавая, але адначасова і таварыская. Тут і патлумачаць, калі чаго не ведаеш ці сумняваешся, і жартам падтрымаюць пры неабходнасці.

Толькі добрыя словы пра маладога спецыяліста гаворыць начальнік свінакомплексу Валянціна Андрэеўна Чарная: «Ніякіх прэтэнзій да Алесі няма, дзяўчына адносіцца да сваёй работы сур’ёзна, хутка ўвайшла у курс спраў, асвоілася. І калі пасля двух гадоў выкажа жаданне працягваць у нас працаваць, мы будзем толькі рады».

Андрэй БУРЭЦ.