У Віцебскай вобласці з’явіліся першыя ахвяры зімовай рыбалкі. Першая трагедыя адбылася 20 снежня на Янавіцкім возеры. Мужчына паехаў на дачу пад Віцебскам і не адказваў на тэлефонныя званкі. А 21 снежня яго цела знайшлі вадалазы прыкладна за 30 метраў ад берага. Другая трагедыя адбылася ў Шумілінскім раёне. На беразе возера Дабейскае знайшлі матацыкл. 21 снежня вадалазы дасталі з вады цела 66-гадовага жыхара райцэнтра.
Нягледзячы на прафілактычную работу, якую праводзяць адпаведныя службы, праблема небяспечнай для жыцця рыбалкі заўсёды застаецца актуальнай. Так, за мінулы сезон у Беларусі ахвярамі сталі больш за тры дзясяткі рыбакоў.
Старшыня раённага таварыства выратавання на вадзе Уладзімір Валер’евіч Катовіч у чарговы раз нагадвае, што выхад на лёд забараняецца, пакуль яго таўшчыня не дасягне сямі сантыметраў. На дадзены момант пры наяўных умовах надвор’я (адсутнасць моцных маразоў, асадкі ў выглядзе снегу) лёд не дасягнуў неабходнай трываласці, каб можна было выходзіць на зімовую рыбалку. Паважаныя аматары рыбнай лоўлі, не рызыкуйце сваім жыццём, дачакайцеся бяспечных умоў!
Андрэй БУРЭЦ.
