29 снежня ў раённым Цэнтры культуры адбыўся традыцыйны дабрачынны навагодні ранішнік “Вітаем цябе, Новы год!”, на які арганізатары мерапрыемства запрасілі дзяцей-інвалідаў, сірот, дзяцей, з апякунскіх сем’яў. Святочнае мерапрыемства прайшло ў межах рэспубліканскай акцыі “Нашы дзеці”.
Несумненна, што кожны хлопчык і дзяўчынка з нецярпеннем чакаюць навагодніх свят, калі спаўняюцца іх самыя запаветныя мары і жаданні, калі дарослыя дораць ім дабрыню, пяшчоту, ласку і надзею на шчаслівае будучае.
Радасць свята разам з дзецьмі раздзялілі намеснік старшыні раённага выканаўчага камітэта Юрый Васілеўскі, начальнік аддзела па адукацыі райвыканкама Кацярына Міхнёнак, спецыялісты гэтага аддзела.
— Дарагія дзеці, я сардэчна віншую вас з Новым годам! Разам з вамі ад гэтага свята мы чакаем прыемных момантаў і спаўнення жаданняў. Няхай у 2021 годзе ў вас заўсёды будзе добры настрой, моцнае здароўе і ўсмешкі на вашых абліччах, — з такімі словамі звярнуўся да хлопчыкаў і дзяўчынак Юрый Анатольевіч.
Кожны з дзетак атрымаў салодкія падарункі з рук намесніка старшыні райвыканкама.
Гульні, конкурсы, забавы і, канечне ж, карагоды пад вясёлую музыку дарылі дзецям работнікі раённага Цэнтра культуры. А колькі іскрынак радасці і задавальнення ззялі ў дзіцячых шчырых вочках! Нават таты і мамы, якія прыйшлі на ранішнік разам з імі, таксама паверылі ў цуды. Бо жаданні і мары, якія загадваюць людзі пад Новы год абавязкова збываюцца, асабліва, калі верыць у гэта.
Сяргей РАЙЧОНАК.
