Аб правілах карыстання жылымі памяшканнямі расказвае юрысконсульт УКП ЖКГ Вольга Вецюгова

Дом адзін — а жыхароў многа. Таму пражыванне ў шматкватэрных дамах патрабуе ад жыхароў паважлівых адносін адзін да аднаго і да ўстаноўленых норм і правіл пражывання. На жаль, не заўсёды так атрымліваецца,  паміж суседзямі могуць узнікаць канфлікты, а тэрыторыі і памяшканні, якімі карыстаюцца ўсе, не ўтрымлівацца ў належным стане. Усе патрабаванні і нормы змешчаны ў Правілах карыстання жылымі памяшканнямі, утрымання жылых і дапаможных (пад дапаможнымі маюцца на ўвазе лесвічныя клеткі, вестыбюлі, пазакватэрныя калідоры і кладоўкі і іншае)  памяшканняў жылога дома ў Рэспубліцы Беларусь і дамовамі, якія заключаюцца ва ўстаноўленым парадку з наймальнікамі, уласнікамі жылых памяшканняў, членамі арганізацый грамадзян-забудоўшчыкаў. Больш падрабязна на гэтую тэму мы размаўляем з юрысконсультам УКП ЖКГ Вольгай Іванаўнай ВЕЦЮГОВАЙ.

— Вольга Іванаўна, якія патрабаванні прад’яўляюць Правілы да жыхароў?

— Адпаведна з Правіламі грамадзяне павінны прытрымлівацца наступных патрабаванняў: захоўваць санітарна-гігіенічныя нормы, а гэта значыць, падтрымліваць чысціню і парадак у жылых і падсобных памяшканнях, на балконах і лоджыях, у дапаможных памяшканнях жылога дома і на тэрыторыі каля яго, рабіць чыстку дываноў і іншага ў вызначаных месцах. Таксама трэба забяспечваць у жылых і дапаможных памяшканнях захаванасць канструкцыйных элементаў і інжынерных сістэм, захоўваць правілы пажарнай бяспекі, правілы карыстання санітарна-тэхнічным і іншым абсталяваннем.

— А вось што трэба рабіць, калі жыхары ўбачылі нейкую няспраўнасць?

— Пры выяўленні пашкоджанняў канструкцыйных элементаў, інжынерных сістэм і іншага, што можа ўяўляць небяспеку, калі жыхары не могуць адразу прыняць меры і справіцца з імі ўласнымі сіламі, трэба паведаміць пра іх наймадаўцу, уласніку, эксплуатуючай арганізацыі або адпаведнай аварыйнай службе.

—  Што забараняецца рабіць жыхарам у жылых, падсобных і дапаможных памяшканнях жылога дома і тэрыторыі каля яго?

— Захоўваць выбуховыя, атрутныя і забруджваючыя паветра рэчывы і прадметы, а таксама лёгкія на загаранне рэчывы з парушэннем правілаў захавання і карыстання, застаўляць лесвічныя клеткі, калідоры, праходы, запасныя выхады і дапаможныя памяшканні жылога дома, устройваць без дазволу мясцовых выканаўчых або распарадчых органаў, жыллёва-эксплуатацыйнай арганізацыі склепы і іншыя памяшканні пад лоджыямі і балконамі, у падвалах і тэхнічных падполлях і паверхах.

— А якое пакаранне можа чакаць парушальніка?

— Парушэнне Правіл, а таксама адзіных правіл і норм тэхнічнай эксплуатацыі і рамонту дзяржаўнага і прыватнага жыллёвых фондаў, пажарнай бяспекі, санітарнага ўтрымання лесвічных клетак, пад’ездаў, другіх дапаможных памяшканняў, жылых памяшканняў і інжынернага абсталявання, безгаспадарчае іх утрыманне, псаванне жылых дамоў і іншага, самаўпраўства ў рэалізацыі сваіх інтарэсаў і ўшчамленне законных правоў і інтарэсаў іншых грамадзян выклікае адміністрацыйную, крымінальную і іншую адказнасць адпаведна з заканадаўствам Рэспублікі Беларусь.

— І колькі можа каштаваць гэта кашальку?

— Напрыклад, парушэнне Правіл карыстання жылымі памяшканнямі можа выклікаць штраф у памеры ад 10 да 30 базавых велічынь, парушэнне ў жылых памяшканнях і іншым заканадаўства аб пажарнай бяспецы выклікае папярэджанне або штраф да 30 базавых велічынь.

— Як паказвае практыка, гэта не такая ўжо рэдкая сітуацыя, калі паміж суседзямі ўзнікае канфлікт, і яны не могуць вырашыць яго самастойна. Што рабіць у такім выпадку?

— Тады таму баку, які лічыць, што яго інтарэсы парушаюцца, трэба звяртацца да нас. Мы разбяромся ў сітуацыі, складзем пратакол і накіруем яго на разгляд у суд, які вынясе рашэнне аб адміністрацыйным пакаранні.

— Курэнне ў пад’ездах… Ці з’яўляецца гэта парушэннем правіл і ці прадугледжана за яго пакаранне?

— Курэнне не дапускаецца ў падсобных памяшканнях кватэры, дзе пражываюць некалькі наймальнікаў або ўласнікаў, а таксама ў дапаможных памяшканнях жылого дома. Такім чынам, у адносінах суседзей, якія кураць у пад’ездзе, можа быць выкарыстаны адміністрацыйны штраф.

— Вольга Іванаўна, дзякуй за змястоўную гутарку.

Гутарыў Андрэй БУРЭЦ.