Часам чалавек зменіць шмат працоўных месцаў, паспрабуе шмат прафесій перад тым, як адшукаць сваё прызванне, сваё месца ў жыцці. Менавіта так адбылося з дырэктарам РВУ “Шаркаўшчынарайгаз” Эдвардам Эдвардавічам Вялічкам. Закончыўшы Шаркаўшчынскую сярэднюю школу № 1, ён год правучыўся ў тэхнічным вучылішчы ў Мінску. Потым была ваенная служба. Ад прыроды атлетычнага целаскладу, ён служыў у Германіі ў спартыўным клубе. Зрэшты, спорт заўсёды меў і мае важнае значэнне ў яго жыцці. Яшчэ падчас службы скончыў Беларускі дзяржаўны інстытут фізічнай культуры і спорту. Мае званне майстра спорту па акадэмічнаму веславанню, выступаў у гэтым відзе за каманду ЦСКА, зборную БССР. Акрамя гэтага поспехаў дасягнуў у гіравым спорце, цікавяць валейбол, армрэслінг.
Пасля службы ў арміі вярнуўся ў Шаркаўшчыну, працаваў метадыстам РДК, старшынёй раённага спорткамітэта, настаўнікам фізкультуры ў Верацеях. А потым паступіў на службу ў міліцыю, скончыў завочна міліцэйскую акадэмію і адпрацаваў 8 гадоў у Шаркаўшчынскім РАУС. Наперадзе чакаў чарговы рэзкі паварот у лёсе: вырашыў паспрабаваць сябе ў камерцыі, у яго быў уласны магазін. За гэты час паездзіў па ўсёй Беларусі і за яе межамі. Пазней уладкаваўся ў ПМС спачатку майстрам, потым — прарабам. І толькі пасля гэтага прыйшоў у райгаз, пачынаў прыёмшчыкам заказаў, быў прызначаны майстрам, працаваў намеснікам тэхінспекцыі ў “Віцебскаблгазе”, дырэктарам Лёзненскага райгаза і вось 5 гадоў узначальвае РВУ “Шаркаўшчынарайгаз”. Адным з яго асноўных патрабаванняў да калектыву з’яўляецца дысцыпліна, сур’ёзныя адносіны да работы кожнага спецыяліста і работніка. Вялікая ўвага надаецца знешняму выгляду вытворчай тэрыторыі прадпрыемства, неаднаразова шаркаўчане займалі прызавыя месцы ў аглядах-конкурсах на лепшае добраўпарадкаванне.
Асобнае месца ў жыцці Эдварда Эдвардавіча займае творчасць, гэта, як кажуць, занятак для душы. Піша жартаўлівыя вершы, байкі, апавяданні, словы для песень, многія з якіх уласна і выконвае. З’яўляецца ўдзельнікам народнага літаратурна-музычнага аб’яднання “Світанак”. Сваю цікавасць да творчасці Эдвард Эдвардавіч прывівае і ў калектыве, значных поспехаў дасягнулі шаркаўшчынскія газавікі ў мастацкай самадзейнасці, займаюць высокія месцы на ўнутрыгаліновых конкурсах.
Як жа ўдаецца нашаму герою знаходзіць час на ўсё — на работу, сям’ю, спорт, творчасць?
— Калі шчыра, — адказвае Эдвард Эдвардавіч, — то часу якраз і не хапае. Ну а для таго, каб паспяваць болей, павінна быць самадысцыпліна, уменне вызначаць галоўнае для сябе. Напэўна, дапамагае і тое, што ўстрымліваюся ад шкодных звычак, люблю жыццё, прыроду, гумар.
Андрэй БУРЭЦ, фота аўтара.