З музычна-гульнёвай праграмай “Вясёлыя ноткі” перад выхаванцамі дзіцячых садоў нашага гарадскога пасёлка выступаюць юныя музыканты Шаркаўшчынскай дзіцячай школы мастацтваў. Адно з такіх выступленняў паспяхова прайшло 12 красавіка ў дзіцячым яслі-садзе № 1. Ужо не першы год школа мастацтваў супрацоўнічае з дзіцячымі дашкольнымі ўстановамі нашага раёна і займаецца падрыхтоўкай цікавых забаўляльных канцэртаў для самых маленькіх гледачоў. Вось і на гэты раз выступленні юных артыстаў, якія выходзілі на сцэну ў ролі казачных персанажаў, суправаджаліся песнямі, танцамі, вясёлымі гульнямі, цікавымі харэаграфічнымі пастаноўкамі і знаёмствам з некаторымі музычнымі інструментамі. Вясёлая забаўляльная праграма вельмі спадабалася маленькім гледачам, якія сустракалі кожнае новае выступленне гучнымі апладысментамі. Адна з асноўных мэтаў такіх акцый — прыцягненне дзяцей дашкольнага ўзросту да чароўнага свету музыкі. А цікавую канцэртную праграму разам са сваімі вучнямі падрыхтавалі і правялі педагогі дзіцячай школы мастацтваў – Вольга Уладзіміраўна Камкова, Наталля Вінальеўна Свяцкая і Людміла Дамінікаўна Сухоўская.
Вольга ЧАРНЯЎСКАЯ.
