Спажывецкая кааперацыя іграе немалаважную ролю ў жыцці краіны і аказвае станоўчы эфект на развіццё эканомікі. У цяперашні час яна займае амаль усе нішы ў эканамічных сферах: гандаль, бытавое абслугоўванне, будаўніцтва, сельская гаспадарка. Найбольшае распаўсюджванне атрымалі спажывецкія кааператывы. Розная форма іх арганізацыі дазваляе грамадзянам дасягаць пастаўленых мэт, забяспечваць занятасць насельніцтва.
Традыцыйна Міжнародны дзень спажывецкай кааперацыі адзначаюць у першую суботу ліпеня. Шаркаўшчынскія кааператары, а менавіта работнікі філіяла кансервавага завода, напярэдадні гэтай даты сабраліся на ўрачысты сход у раённым Цэнтры культуры. Да прысутных калег са словамі віншавання звярнулася дырэктар Полацкай універсальнай базы Ларыса Іванаўна Краўчыня. Яна падкрэсліла, што гэта важны дзень у жыцці прадпрыемства, таму што за вынікамі работы калектыву заўсёды трэба бачыць сумленную працу кожнага чалавека і паважаць яго за гэта.
Затым Ларыса Іванаўна разам з дырэктарам кансервавага завода Сяргеем Мікалаевічам Макаранкам уручылі Ганаровыя граматы, Падзякі, грашовыя прэміі і, канечне ж, кветкі лепшым работнікам філіяла. На свяце прысутнічаў таксама і старшыня Шаркаўшчынскага райвыканкама Мікалай Ірынархавіч Баговіч. Ён далучыўся да віншаванняў у адрас кааператараў, пажадаў плённай працы, дабрабыту ў сем’ях, аптымізму і ўпэўненасці ў заўтрашнім дні.
А самадзейныя артысты падрыхтавалі для ўдзельнікаў урачыстасці невялікую святочную праграму з песнямі і цыркавымі нумарамі.
Сяргей РАЙЧОНАК
