На Купалле на святое
Рві, матуля, зелле тое,
Што ў нас папараць завецца!
І шчаслівым быць здаецца!
Янка Купала.
Народнае свята Купалле ў ноч з 6 на 7 ліпеня адзначалася амаль у кожнай цэнтральнай сядзібе нашага раёна. Шаркаўчане, як і ў мінулыя гады, адпачывалі ў парку сельгастэхнікі.
Купалле — гэта вяршыня лета, час, на які прыпадае найвялікшы росквіт прыроды. У яго глыбокія карані з язычніцкіх часоў, калі чалавек імкнуўся жыць у гармоніі з прыродай. Гэта свята раслін, вады і сонца. У гэты час травы набываюць гаючыя сілы, а людзі вераць, што менавіта ў купальскую ноч здзяйсняюцца цуды.
Работнікі раённага Цэнтра культуры ажыццявілі тэатралізаваную пастаноўку “На Івана ночка мала”. Самадзейныя артысты умела весялілі прысутную публіку сваёй шчырай ігрой на сцэне.
Яшчэ зранку на лугах можна было заўважыць дзяўчат, якія шукалі найпрыгажэйшыя краскі, каб паспець да вечара сплесці вянкі. Для іх праводзіўся конкурс “Купалінка – 2016”. Удзельніцы — Ірына Малыш, Юлія Гірстун і Алена Мацвеева — у разнастайных конкурсных этапах спрачаліся за званне прыгажуні чароўнай купальскай ночы. Журы, дарэчы, у гэтым конкурсе не было. Пераможцу павінны былі абраць прысутныя гледачы сваімі гучнымі апладысментамі і гоманам “Ура!”. Тытул “Купалінка—2016” у выніку атрымала Ірына Малыш.
У народзе кажуць, што можна бясконца глядзець на агонь, бо у яго гарэнні ўвасабляецца сонца, а само полымя надзелена таямнічай сілай даваць добры ўраджай. Шаркаўчане загадкавым позіркам пільна назіралі, як прыгожа хісталіся калючыя языкі агню, несучы з сабой чароўную загадкавасць і цеплыню.
У даўніну спаць ці сумаваць у купальскую ноч забаранялася і лічылася грахом. Трэба было весяліцца на поўную моц і ад усёй душы. Адным словам, удзельнікі свята ў Шаркаўшчыне традыцыю выканалі, а галоўнае, атрымалі задавальненне і добры настрой.
Сяргей РАЙЧОНАК.
