Каму не хочацца пражыць доўга на гэтай зямлі? Тыя, хто дасягнулі даўгалецця, дзеляцца сваімі сакрэтамі. Адзін з іх — няспынная праца і пастаянная занятасць любімай справай. Нават тады, калі наступае пенсійны ўзрост, трэба не спыняцца дзейнічаць.
Як інфармуе статыстыка, у Беларусі пражывае 557 чалавек, якія дасягнулі 100 гадовага ўзросту і болей. Шкада, што толькі 76 з іх — мужчыны. “Лаві імгненні і памятай пра смерць” — казалі ў Старажытным Рыме. Вось і вырашылі нашы пенсіянеры займаць свой вольны час карыснай справай.
У бібліятэцы аграгарадка Іёды мы з чытачамі стварылі аматарскае аб’яднанне.
Спачатку напісалі аб’яву наступнага зместу: “Тыя, каму неабыякавы сучасныя праблемы, у каго ёсць пра што пагаварыць, чым падзяліцца, запрашаем на арганізацыйнае пасяджэнне клуба “Цёплыя сустрэчы”.
У назначаны дзень у бібліятэцы было шматлюдна. На першым пасяджэнні пенсіянеры і працаўнікі розных прафесій абмяркоўвалі мэты і задачы будучых сустрэч, пазнаёміліся з планамі і абавязкамі членаў клуба. Важна, каб кожны расказаў, што яго цікавіць у сучасным жыцці, пра што хоча даведацца глыбей (у гэтым дапаможа літаратура). Плануем абмяркоўваць прачытаныя кнігі, прагледжаныя кінафільмы.
Такое пасяджэнне будзе праходзіць раз у месяц па рознай тэматыцы і ў рознай форме: тэматычныя гутаркі, пасядзелкі за кубачкам чаю, ушанаванне юбіляраў, сустрэчы з цікавымі людзьмі, размовы за круглым сталом і многае іншае.
Дэвізам клуба сталі наступныя словы:
“Любоў да кнігі ўсіх яднае.
Не лічым мы свае гады.
Калі хто ў клуб наш завітае.
Ён звяжа лёс з ім назаўжды”.
Г. ЯБЛОНСКАЯ,
бібліятэкар Іёдскай бібліятэкі