11 верасня з самага ранку стаяла цёплае сонечнае надвор’е. Такая акалічнасць дадавала добрага настрою людзям, якія крочылі на выбарчыя ўчасткі, каб скарыстаць сваё канстытуцыйнае права і аддаць голас за кандыдата ў дэпутаты Палаты прадстаўнікоў Нацыянальнага сходу Рэспублікі Беларусь шостага склікання.
Выбарчы ўчастак № 33, які размясціўся ў сярэдняй школе № 2 гарадскога пасёлка, адкрыў свае дзверы а восьмай гадзіне раніцы. Некаторыя выбаршчыкі ўжо чакалі гэтай хвіліны ў фае.
Першым, хто прыйшоў галасаваць на гэты ўчастак аказалася жыхарка райцэнтра Жанна Святаславаўна Сініца. Старшыня выбарчай камісіі Алеся Іванаўна Сікора павіншавала яе з такой знакавай падзеяй і ўручыла падарунак.
Пакрысе падыходзілі жыхары райцэнтра на участкі для галасавання, якія размяшчаліся ў адміністрацыйным будынку ДБУ № 26 і раённым Цэнтры культуры, каб прагаласаваць за таго або іншага кандыдата ў дэпутаты і тым самым праявіць сваю актыўную грамадзянскую пазіцыю.
Спецыялісты раённага Цэнтра культуры і вучні школ правялі цікавыя канцэртныя праграмы на выбарчых участках не толькі ў гарадскім пасёлку, але і ў раёне. У выбаршчыкаў была цудоўная магчымасць з карысцю правесці час выхаднога дня — прагаласаваць, паслухаць добрыя песні, а таксама набыць харчовыя тавары, багаты асартымент якіх прапаноўвалі пакупнікам работнікі філіяла “Шаркаўшчынскі кансервавы завод”. Буфеты па продажы свежай выпечкі, кандытарскіх і кулінарных вырабаў працавалі побач з тэрыторыямі выбарчых участкаў.
Захаванне супрацьпажарнай бяспекі і правапарадак падчас правядзення датэрміновага галасавання і ў асноўны дзень выбараў забяспечвалі супрацоўнікі раённага аддзела па надзвычайных сітуацыях і раённага аддзела ўнутраных спраў. Наогул, выбары дэпутатаў Палаты прадстаўнікоў Нацыянальнага сходу Рэспублікі Беларусь шостага склікання прайшлі ў спакойнай дзелавой атмасферы.
Сяргей РАЙЧОНАК.
