Уражанні ад фестывалю:
Дзяніс Ясіновіч, Сцяпан Александровіч і Мікіта Плясун, трыо баяністаў Браслаўскай ДШМ:
— Удзячны арганізатарам фестывалю за запрашэнне на мерапрыемства, а таксама нашаму музычнаму кіраўніку Ірыне Аляксандраўне Белусь за падтрымку. Сёння для гледачоў і гасцей прагучаць дзве кампазіцыі “Шалом Алейхам” і “Гарэзлівая полька”. Пазнаёміцца яшчэ ні з кім не паспелі, так як шмат часу аддалі на рэпетыцыю, каб добра выступіць. Перад выступленнем вельмі хвалюемся: незнаёмая сцэна, шмат людей, нас будзе ацэньваць журы, але спадзяёмся, што ўсё будзе добра.
Вія Пятрова, кіраўнік ансамбля каклеістаў «Іскарка» Шпогскай музычнай і мастацкай школы:
— Мае дзяўчаты добра падрыхтаваліся да выступлення і амаль не хвалююцца. Пяць вучаніц сыграюць на незвычайным інструменце — кокле, такога тут дакладна ні ў каго больш не ўбачыце. Незвычайны ён сваёй формай, а яшчэ тым, што кокле не ўдарны струнны інструмент, як, напрыклад, цымбалы, а шчыпковы. Мы добра ведаем, што ў вашай школе мастацтваў вельмі кваліфікаваныя настаўнікі, якія добра вучаць сваіх дзяцей. Спадзяёмся, што зможам скласці ім годную канкурэнцыю.
Людміла Вараб’ёва, кіраўнік аддзялення фартэпіяна Зарасайскай мастацкай школы:
— Мы ўпершыню прыехалі ў Беларусь. З вялікім задавальненнем адзначае прыгажосць вашага краю і чысціню. Нас тут цёпла сустрэлі гледачы, падтрымалі апладысментамі. Вельмі цікава было паглядзець на таленавітых дзяцей, а таксама паслухаць падрыхтаваныя творы.
Ансамбль цымбалістаў «Забава» Глыбоцкай ДШМ:
— Мы ўпершыню на такім маштабным мерапрыемстве і ўдзячныя за запрашэнне, а таксама за магчымасць паказаць свае таленты і паглядзець на іншых. Цікава даведацца пра вынікі музычнага фестывалю. Спадзяемся, што нашы чатыры калектывы не застануцца незаўважанымі журы і іх выступленні добра ацэняць.
Паліна Свікліс і Валерыя Марозава, цымбалісткі Ахрэмаўскага філіяла Браслаўскай ДШМ:
— Сяброўская атмасфера фестывалю вельмі падабаецца. Нам здаецца, што ўсе хто сёння выступіў, заслугоўваюць перамогі. У вашым Цэнтры культуры вялікая і зручная сцэна, мы нават крыху разгубіліся. Пасля свайго выступлення пазнаёміліся з дзяўчынкамі з Шаркаўшчыны, Паставаў, Міёраў і Глыбокага. Ад фестывалю ў нас мноства пазітыўных эмоцый. Абавязкова прыедзем да вас яшчэ.
Узорны ансамбль народнай музыкі і песні «Званочкі» Варапаеўскай ДШМ:
— Мы вельмі рады, што журы нас ацаніла па заслугах. У сваёй намінацыі «Інструментальны ансамбль малой формы ад 6 да 12 чалавек» мы занялі першае месца. Выступаць у вас вельмі спадабалася, нас добра сустрэлі гледачы. Сёння мы знайшлі тут новых сяброў. Людзі тут вельмі добрыя, мілыя. А навокал ўсё прыгожа і дагледжана. Спадзяёмся, што нас запросяць сюды яшчэ. Хочацца шчыра падзякаваць усім шаркаўчанам за такі цёплы прыём!
Ансамбаль гітарыстаў Шаркаўшчынскай ДШМ:
—Сёння сустрэліся са сваімі суседзямі з краін Прыбалтыкі і адчулі наколькі яны нам блізкія: і па культуры, і па каштоўнасцях, і як людзі. Іх рэпертуар сапраўды аўтэнтычны, а самі яны — такія добрыя і шчырыя! Сам фестываль — гэта цудоўная пляцоўка, дзе можна абменьвацца вопытам. Мы пазнаёмілася з цудоўнымі людзьмі, набылі шмат новых сяброў. Шчыры дзякуй арганізатарам фестывалю.
Уражанні запісала Алена АНАНІЧ.
