Ужо стала добрай традыцыяй святкаваць у нашым раёне нараджэнне святога Яна Хрысціцеля ў аграгарадку Германавічы. І гэтым разам 24 чэрвеня мерапрыемства сабрала шмат удзельнікаў, сярод якіх былі не толькі католікі, але і праваслаўныя вернікі.
У кожнага чалавека ёсць любімы і дарагі сэрцу куток, дзе ён нарадзіўся, вырас, стаў на ногі. Ёсць калодзеж, смак вады з якога не пераблытаеш ні з чым іншым. Менавіта сюды цягнецца стомленая душа, каб адпачыць, набрацца сіл і жыць далей. Для многіх прысутных на свяце такім месцам і з’яўляюцца Германавічы.
У касцёле
У пачатку ў касцёле Перамянення Пана ксёндз Ян прывітаў ксяндза Андрэя з Мінскай парафіі, які і адслужыў святую Імшу. У сваёй пропаведзі святар Андрэй, звяртаючыся да прыхаджан, заклікаў шанаваць і паважаць старэйшых людзей, часцей наведваць храм, каб жыць з Богам у душы. Пасля бласлаўлення словы ўдзячнасці за прысутнасць, супольную малітву і Божае слова ксяндзу Андрэю выказалі мясцовыя вернікі. Святар у сваю чаргу падзякаваў жыхарам Германавіч за адметную шчырасць і гасціннасць.
Ад вернікаў Мінскай парафіі і парафіян касцёла Перамянення Пана прагучалі віншаванні пробашчу касцёла з імянінамі, яму ўручылі падарункі, выказалі пажаданні моцнага здароўя і доўгіх год служэння на ніве духоўнасці.
Разам — да вогнішча
Урачыстым шэсцем вернікі рушылі са святым агнём да Германавіцкага Цэнтра культуры і народных традыцый, дзе праходзіла другая частка свята.
Звяртаючыся да прысутных ксёндз Ян павіншаваў усіх з цудоўным святам нараджэння святога Яна Хрысціцеля, пажадаў кожнаму добрага настрою і прыемнага адпачынку. Старшыня Германавіцкага сельвыканкама Алена Рубін падзякавала святарам за праведзенае богаслужэнне і павіншавала ксяндза Яна з імянінамі, уручыла букет кветак і падарунак.
Пры ўваходзе ў глядзельную залу была размешчана выстава Ульяны Сташкевіч пад назвай “Праца маіх рук “.
Самадзейныя артысты Германавіцкага ЦК і НТ падрыхтавалі невялікі канцэрт. Тэатралізацыя чаргавалася з выкананнем песень, якія спявалі дарослыя, а маленькія дзеці падрыхтавалі танцавальныя нумары. Не абышоўся гэты дзень без конкурсу на лепшую Купалінку, якую выбіралі гледачы. Прадстаўніцы з Сталіцы, Зоркі, ААТ “Княж” прадэманстравалі свае творчыя здольнасці і прыгажосць на сцэне. Лепшую Купалінку выбралі апладысментамі — ёй стала прадстаўніца ААТ “Княж”.
З песнямі і народнымі танцамі на свята завіталі нашы суседзі — калектыў “Глубоцкія дзяўчаты” з Глыбоцкага Дома культуры.
Хтосьці ў гэты час глядзеў канцэртную праграму, хтосьці разам з дзецьмі забаўляліся на разнастайных атракцыёнах, іншыя пажадалі добра падсілкавацца на вольным паветры за столікамі, набыўшы харчовыя тавары, кандытарскія прысмакі ў гандлёвых кропках, якія працавалі ў той вечар у Германавічах.
Кульмінацыяй свята стала традыцыйнае запальванне купальскага вогнішча. Мясцовая моладзь зачаравана назірала за полымем вялікага вогнішча, углядаючыся ў яго з жаданнем спаўнення сваіх мар.
Алена АНАНІЧ.
