Сярод чытачоў газеты “Кліч Радзімы” нямала такіх, якія выпісваюць раённае перыядычнае выданне не першы дзясятак гадоў. У іх ліку — 93-гадовая жыхарка гарадскога пасёлка Анна Мацвееўна Лонская. Яна
стала выпісваць “раёнку”, калі прыехала ў 1946 годзе ў Шаркаўшчыну, з той самай пары з ёй і не развітваецца. У газеце, па словах самой жанчыны, адлюстравана ўсё жыццё шаркаўчан, дзякуючы “Кліч Радзімы” прасцей за ўсё атрымаць найбольш дакладную інфармацыю пра падзеі рэгіёна. Вось і 24 лютага Анна Мацвееўна разам з іншымі нашымі чытачамі асабіста завітала ў фае раённага вузла паштовай сувязі на “Дзень падпісчыка”, каб аформіць квартальную падпіску на любімую газету. У гэты дзень супрацоўнікі рэдакцыі праводзілі бяспройгрышную латарэю для жыхароў раёна. Невялікія падарункі ад “Кліч Радзімы” сталі прыемнай нечаканасцю як для пастаянных, так і для нашых новых чытачоў. Спадзяёмся, што іх стане яшчэ больш.
Людзі з задавальненнем прынялі ўдзел у акцыі. Многія выказвалі свае
думкі і прапановы, давалі парады адносна таго, якія матэрыялы і рубрыкі з’яўляюцца найбольш цікавымі для розных пакаленняў шаркаўчан. А пажаданні жыхароў раёна — гэта галоўнае, на што арыентуюцца ў сваёй рабоце супрацоўнікі рэдакцыі. Усе яны будуць абавязкова ўлічаны. І шчырае дзякуй вам, паважаныя чытачы, што сярод вялікай колькасці розных перыядычных выданняў па-ранейшаму выбіраеце сваю “раёнку”.
Вольга СТАШЭЎСКАЯ