Свежыя булачкі для шаркаўчан выпякаюць у міні-кандытарскай універсама № 5

—

На працягу апошніх месяцаў універсам № 5, што знаходзіцца на вуліцы Максіма Горкага, набыў асаблівую папулярнасць сярод сваіх наведвальнікаў. Прычынай гэтаму стала адкрыццё ў будынку гандлёвага аб’екта міні-кандытарскага цэха, прадукцыя якога раскупляецца за лічаныя гадзіны.

—    Сваім пакупнікам прапануем шырокі асартымент разнастайнай выпечкі, — паведамілі кандытары аддзела грамадскага харчавання райспажыўтаварыства Алена Лявонцьеўна Нікалаева і Алена Мікалаеўна Пронька. — Найбольшым попытам карыстаюцца булачкі з начынкай, у якасці якой выкарыстоўваем яблыкі і капусту, згушчонае малако, шакалад, карыцу і тварог. Сярод нашых вырабаў — таксама пірагі з яблыкамі і тварагом, смятаннікі, пірожныя з вяршкамі і згушчоным малаком, торты, мядовікі. Прадукцыя міні-кандытарскага цэха рэгулярна пастаўляецца ў тры ўніверсамы гарадскога пасёлка, а таксама ў “Бістро”, кафэ і рэстаран. Штодзённая выручка ад рэалізацыі кандытарскіх вырабаў складае прыкладна 1 мільён рублёў.

Пэўная работа праводзіцца і для таго, каб павялічыць асартымент прадукцыі кандытарскага міні-цэха. Ўжо зусім хутка з дапамогай сучаснага абсталявання пачнём выпякаць свежы гарачы хлеб і багеты. А ў цяперашні час ва ўніверсаме № 5 прымаюцца заяўкі ад насельніцтва на выпечку тортаў для вяселляў, юбілеяў, іншых адметных дат. Напярэдадні 8 Сакавіка мужчыны могуць парадаваць сваіх палавінак  прыгожым салодкім пачастункам. Цана торта вагой у 1 кілаграм на сённяшні дзень складае прыкладна 50 тысяч рублёў (без уліку кантэйнера).

Свежая выпечка кандытарскага міні-цэха пастаўляецца ў магазіны і пункты грамадскага харчавання штодзённа, акрамя суботы і нядзелі. Частыя наведвальнікі універсама № 5 ўжо добра ведаюць, у які прамежак часу патрэбна прыходзіць за салодкай прадукцыяй. Працэс выпякання завяршаецца прыкладна ў 12.00 і ў 16.00 гадзін, і адразу пасля гэтага салодкія і духмяныя пачастункі для шаркаўчан накіроўваюцца на прылаўкі ўніверсама.

Вольга СТАШЭЎСКАЯ.