У другой палове мінулага месяца ў Савеце Рэспублікі Нацыянальнага сходу Рэспублікі Беларусь адбыўся форум, на якім абмяркоўвалася тэма “Роля інтэлігенцыі ў развіцці сацыяльнай сферы сяла”. З удзелам настаўнікаў і ўрачоў, ветэрынараў і аграномаў, работнікаў культуры і прадстаўнікоў некаторых іншых прафесій парламентарыі паспрабавалі канкрэтызаваць ролю і задачы інтэлігенцыі ў развіцці сельскіх тэрыторый.
Удзел у рабоце форуму прынялі дэпутаты розных узроўняў, кіраўнікі рэспубліканскіх органаў дзяржаўнага кіравання, прадстаўнікі сельскай інтэлігенцыі і грамадскасці.
Сярод запрошаных на мерапрыемства ў складзе дэлегацыі Віцебскай вобласці была дырэктар Лужкаўскай сярэдняй школы, дэпутат раённага Савета дэпутатаў Ларыса Віктараўна Гараніна, якая падчас работы форуму падзялілася з прысутнымі вопытам сваёй педагагічнай дзейнасці і выступіла на тэму “Валеалагічнае і экалагічнае навучанне і выхаванне вучняў ва ўмовах сельскай школы”. А падчас цырымоніі ўзнагароджвання, якая праходзіла ў Савеце Рэспублікі Нацыянальнага Сходу Рэспублікі Беларусь, яго старшыня Міхаіл Мясніковіч уручыў Ларысе Віктараўне Гаранінай Падзяку за шматгадовую добрасумленную працу, высокі прафесіяналізм і поспехі ў навучанні і выхаванні дзяцей.
У ліку тэм, якія абмяркоўваліся падчас пленарнага пасяджэння ў Савеце Рэспублікі, былі развіццё фермерскіх гаспадарак, узаемадзеянне сельгасарганізацый і органаў мясцовага кіравання і самакіравання па стварэнні ўмоў развіцця сельскіх тэрыторый, арганізацыя аказання медыцынскай дапамогі сельскаму насельніцтву, роля грамадскіх інстытутаў у фарміраванні камфортнага пражывання і іншыя.
— Актуальнасць тэматыкі сустрэчы відавочная, — адзначыў Міхаіл Мясніковіч. — Разлічваю, што яна для парламенцкай дзейнасці будзе вельмі карыснай. Члены Савета Рэспублікі будуць улічваць у законатворчым працэсе тыя ідэі і прапановы, якія прагучалі ад удзельнікаў форуму падчас сустрэчы.
Вопытам работы Лужкаўскай сярэдняй школы, у якой на сённяшні дзень у 11 класах-камплектах займаюцца 146 вучняў, на рэспубліканскім форуме падзялілася дырэктар Ларыса Віктараўна Гараніна.
Увесь педагагічны калектыў названай навучальнай установы разам з дзецьмі і іх бацькамі сёння імкнецца вырашыць адну з самых значных і актуальных праблем сучаснасці — захаванне і ўмацаванне здароўя падрастаючага пакалення. Бо, як сцвярджаюць вучоныя, у апошнія дзесяцігоддзі з’явіліся новыя фактары, што садзейнічаюць пагаршэнню стану здароўя дзяцей, у ліку якіх дрэнная экалогія, сацыяльна-эканамічныя праблемы, празмернае захапленне камп’ютарам.
Калектыў Лужкаўскай сярэдняй школы з 2010 па 2013 год працаваў над рэалізацыяй творчага праекта “Укараненне мадэлі сістэмы фарміравання валеалагічнай культуры вучняў сродкамі навучальна-выхаваўчага працэсу” (валеалогія — навука, якая займаецца вывучэннем здароўя чалавека). І сёння ў цэнтры ўвагі настаўнікаў — захаванне здароўя дзяцей. Гэтаму садзейнічаюць многія фактары, ад арганізацыі збалансаванага гарачага харчавання да правядзення Дзён здароўя і работы самых розных спартыўных секцый.
У школе створана сур’ёзная база для экалагічнага навучання і выхавання дзяцей. Прываблівае наведвальнікаў надзвычай прыгожы “Зімовы сад”, які налічвае звыш 100 відаў пакаёвых раслін. Там жа — акварыум з залатымі рыбкамі. “Зімовы сад” — своеасаблівая жывая лабараторыя, дзе на факультатыўных занятках “Пакаёвае кветкаводства” і “Фітадызайн” дзеці вывучаюць расліны, набываюць шмат карысных ведаў і навыкаў. Школьны калектыў на працягу многіх гадоў з вялікім захапленнем рэалізуе праграму “Дызайн школьнага двара”. Таму з’явілася задача: ператварыць кветнікі вакол школы ў міні-калекцыі раслін, на прышкольнай тэрыторыі стварыць міні-кампазіцыі з выкарыстаннем малых архітэктурных формаў.
У Лужках, дзе, як і ў кожным населеным пункце, актуальнай задачай з’яўляецца выхаванне чалавека працы, вялікая работа праводзіцца па добраўпарадкаванні прышкольнай тэрыторыі.
Вялікую ролю у фарміраванні практычных біялагічных ведаў мае школьны дэндрарый. Там юныя лесаводы праводзяць свае даследванні. Створаны гадавальнік дрэўных раслін. Гэты вопыт школа набыла дзякуючы цеснаму супрацоўніцтву з дзяржаўнай навуковай установай “Цэнтральны батанічны сад” горада Мінска. Веды пра карысныя ўласцівасці раслін дзеці атрымліваюць на лекавым агародзе “Зялёная аптэка”, які створаны з мэтай пашырэння ведаў пра травалячэнне, для знаёмства з правіламі вырошчвання і нарыхтоўкі лекавых раслін. Экалагічная сцежка, створаная ў 2005 годзе для арганізацыі вучэбнай і асветніцкай работы школьнага лясніцтва па пытаннях аховы прыроды, з’яўляецца працягам музея прыроды.
Асноўная ж задача Лужкаўскай сярэдняй школы, па словах яе дырэктара, дапамагчы вучням знайсці сваё месца ў жыцці.
Дарэчы, 45 працэнтаў педагогаў — самі выпускнікі Лужкаўскай сярэдняй школы. А ўвогуле, усе настаўнікі разумеюць, што ў іх руках — будучыня сяла, будучыня аграгарадка Лужкі і, вядома ж, будучыня іх дзяцей. Жыццё на сяле не спыніцца, пакуль на яго тэрыторыі дзейнічае школа. А ў Лужках навучальная ўстанова — гэта яшчэ і адно з самых маляўнічых месцаў аграгарадка, дзе захаванне здароўя дзяцей — на першым плане.
Вольга ЧАРНЯЎСКАЯ.