У мінулым месяцы завяршыліся адборачныя этапы спаборніцтваў па настольным тэнісе сярод арганізацый аграпрамысловага комплексу Віцебскай вобласці. У адным з этапаў, які праходзіў у горадзе Паставы, прымалі ўдзел каманды Полацкага, Верхнядзвінскага, Пастаўскага, Міёрскага і нашага Шаркаўшчынскага раёнаў. У спаборніцтвах па тэнісе нашу каманду прадставілі дыспетчар ААТ “Ельня-агра” Юлія Віктараўна Швед і галоўны спецыяліст упраўлення сельскай гаспадаркі і харчавання райвыканкама Мікалай Яўгенавіч Зубовіч. У асабістым заліку сярод жанчын Юлія Швед заваявала 2 месца, а Мікалай Зубовіч увайшоў у тройку лідараў сярод мужчын. Рэзультатам выступлення шаркаўшчынскай зборнай стала 2 агульнакаманднае месца. З заслужанай перамогай прадстаўнікоў нашай каманды павіншавала старшыня райкама прафсаюза работнікаў АПК Таццяна Мікалаеўна Альшэўская. Самі ж ўдзельнікі засталіся задаволенымі і рэзультатамі сваіх выступленняў, і арганізацыяй спаборніцтваў, на якія яны былі накіраваны раённым камітэтам прафсаюза работнікаў АПК.
Юлія Швед нядаўна закончыла Смальянскі дзяржаўны аграрны каледж і вярнулася працаваць на сваю малую радзіму. Апошнія паўгода дзяўчына з’яўляецца дыспетчарам ААТ “Ельня-агра”. А рознымі відамі спорта, асабліва валейболам і тэнісам, Юлія захаплялася яшчэ падчас вучобы ў Зоркаўскай школе,а потым, калі вучылася ў каледжы і ўваходзіла ў склад зборнай каманды гэтай навучальнай установы. Зараз дзяўчына адначасова працуе і вучыцца,завочна атрымлівае вышэйшую адукацыю.
Для Мікалая Зубовіча футбол, валейбол і тэніс сталі любімымі відамі спорта яшчэ ў школьныя гады. Падтрымліваць спартыўную падрыхтоўку на належным узроўні дапамагала і служба ў Шаркаўшчынскім РАУС, дзе Мікалай Яўгенавіч на працягу 20 гадоў узначальваў інспекцыю па справах непаўналетніх і неаднаразова прымаў удзел у спартыўных турнірах рознага ўзроўню і конкурсах прафесійнага майстэрства Таму і зараз трэцяе месца ў асабістым заліку — для яго заканамерны вынік.
Вольга ЧАРНЯЎСКАЯ.