Рэлігійны свет — гэта вельмі каштоўны набытак чалавечай цывілізацыі. Менавіта таму яму трэба ўдзяляць максімальную ўвагу, дасканала вывучаць і, канечне ж, берагчы.
Штогод у трэцюю нядзелю студзеня па ініцыятыве ААН адзначаецца Сусветны дзень рэлігіі. Сваю гісторыю гэта свята вядзе з 1950 года, калі нацыянальны орган упраўлення Веры Бахаі ў ЗША зацвердзіў яго мэтай абвяшчэнне адзінай сутнасці ўсіх сусветных рэлігій і дэманстрацыі таго, што рэлігія — гэта, перш за ўсё, сіла для аб’яднання свету, а не разладу.
У Сусветны дзень рэлігіі ў шматлікіх краінах праходзяць разнастайныя мерапрыемствы — канцэрты, круглыя сталы, семінары і выставы, прысвечаныя праблемам устанаўлення міру і развіцця, талерантнасці ва ўсім свеце, умацаванню ўзаемаразумення паміж паслядоўнікамі ўсіх рэлігій.
Гадзіна духоўнасці прайшла і ў раённай бібліятэцы. Вядучая мерапрыемства Іна Суднік у якасці слухачоў запрасіла на мерапрыемства вучняў 8 «Б» класа сярэдняй школы № 1. Завітаў, каб паразмаўляць з падлеткамі на духоўную тэму, дабрачынны цэркваў Шаркаўшчынскай акругі, настаяцель царквы іконы «Усіх смуткуючых Радасць» протаіерэй Віктар Валашчук.
Свяшчэннік адзначыў важнасць такіх сустрэч з падлеткамі, бо менавіта цяпер, калі ў іх пераходны ўзрост, узнікае шмат пытанняў асабістага жыцця. На простых прыкладах ён растлумачыў дзецям праваслаўнае разуменне спрадвечных пытанняў чалавечага быцця: што ёсць дабро і зло, што такое сумленне, якую ролю яно адыгрывае ў жыцці кожнага чалавека. Расказаў дзецям пра ўзаемаадносіны, пра тое, што любоў да сваіх бліжніх трэба выхоўваць, перш за ўсё, у сям’і. Зрабіў акцэнт на тым, што трэба любіць і паважаць сваіх бацькоў.
Вучні зрабілі вывад, што жыццё дадзена Богам на добрыя справы, а чалавек павінен заставацца заўсёды чалавекам у любых абставінах.
Хлопчыкі і дзяўчынкі азнаёміліся з кніжнай выставай духоўнага накірунку, а таксама літаратурнымі творамі, у якіх змяшчаюцца творы на тэму рэлігіі.
Сяргей РАЙЧОНАК, фота аўтара.