29 верасня, у дзень Святых Арханёлаў па каталіцкім календары, вернікі Лужкаўскай парафіі святкавалі дзень Святога Міхаіла Арханёла, апекуна Мінска-Магілёўскай мітраполіі. Імя менавіта гэтага Святога носіць касцёл у Лужках. А сёлетняя ўрачыстасць для веруючых каталіцкага веравызнання стала асабліва адметнай: упершыню касцёл Святога Міхаіла Арханёла наведаў біскуп Віцебскай дыяцэзіі Алег Буткевіч, які і ўзначаліў святую Імшу.
Нягледзячы на працоўны дзень, храм быў запоўнены вернікамі. Акрамя мясцовага насельніцтва, на фэст прыехала шмат гасцей з навакольных парафій, у ліку якіх – ксёндз-дэкан Крыштаф Сілкоўскі з Шаркаўшчыны, ксёндз Ян Пугачоў з Германавіч, святар Аляксандр Грыцкевіч з горада Дзісна,яны дапамагалі весці святую Імшу і спавядалі вернікаў. Прысутнічала на свяце і сястра законная з Віцебска Ганна Буткевіч.
Напачатку святой Імшы перад уваходам у касцёл парафіяне ўрачыста, хлебам-соллю сустрэлі біскупа Алега Буткевіча. З прывітальнымі словамі да кіраўніка Віцебскай дыяцэзіі звярнуліся ксёндз Лужкаўскай парафіі Міхаіл Татарэнка і музычны кіраўнік касцёльнага хору Таіса Фёдараўна Шабан. Богаслужэнне ў касцёле ў гэты дзень праводзіў біскуп. У сваім слове да вернікаў ён расказаў пра дзень Святых Арханёлаў, свята, якое адзначалася 29 верасня, і звярнуў асаблівую ўвагу на тое, што міласэрны Бог клапоціцца пра чалавека і таму дае анёлаў, магутных нябесных заступнікаў, якія заўсёды прысутнічаюць побач з намі, ахоўваюць нас і дапамагаюць. Падчас Імшы адбылася працэсія з дарамі. Моладзь прынесла да алтара кветкі, як сімвал прыгажосці свету, садавіну і хлеб, што даюць нам фізічныя сілы, а таксама святыя дары: гостыю, віно і ваду, якія ўмацоўваюць наш дух і яднаюць з Богам. Напрыканцы святой Імшы адбылося выстаўленне найсвяцейшага Сакраманту.Завяршылася ўрачыстасць святочнай працэсіяй вакол касцёла, удзел у якой прынялі ўсе веруючыя.
Пасля завяршэння святой Імшы да біскупа, святароў, якія прысутнічалі на ўрачыстасці і вернікаў звярнуўся ксёндз-пробашч Міхаіл Татарэнка. Падчас свайго выступлення ён адзначыў, што веруючыя Лужкаўскай парафіі загаддзя і з вялікай адказнасцю рыхтаваліся да святкавання Дня свайго заступніка, Святога Міхаіла Арханёла,, і выказаў словы падзякі ўсім, хто мае дачыненне да яго арганізацыі і правядзення. Ад імя ўсіх парафіян шчырыя словы падзякі біскупу і ксяндзу-пробашчу выказала жыхарка аграгарадка Дворнава Лілія Мяфодзьеўна Шыпіла. З нагоды свята свае віншаванні касцёлу,прадстаўнікам духавенства,усім гасцям і прысутным адрасавалі старшыня Лужкаўскага сельскага Савета Таццяна Мікалаеўна Краснадубская і дырэктар Лужкаўскай сярэдняй школы Ларыса Віктараўна Гараніна.Шчырыя словы ўдзячнасці ў гэты дзень прагучалі і ў адрас ксяндза Міхаіла Татарэнкі, які ў Дзень Святых Арханёлаў адзначаў свае імяніны.На працягу апошніх 6 гадоў гэты чалавек узначальвае Лужкаўскую парафію, добрасумленна служыць Богу і людзям. –Ад шчырага сэрца мы віншуем ксяндза Міхаіла з нагоды імянінаў і жадаем яму ўсяго самага найлепшага, здароўя, сіл, радасці, добразычлівых людзей, аптымізму, душэўнага спакою і цярплівасці.Няхай заступнік, Святы Міхаіл, абараняе нашага святара ў розных жыццёвых сітуацыях, заўсёды будзе побач і дапамагае ў душпастырскай працы і служэнні людзям,- было адзначана падчас урачыстасці.
