“Звярніце ўвагу на сваё здароўе!”, — заклікалі жыхароў раёна шаркаўшчынскія медыкі, якія 19 і 20 красавіка у месцах, дзе збіраецца значная колькасць людзей, праводзілі акцыю “Беражы здароўе з маладосці, пазбегні інфарктаў і інсультаў”. У гэтыя дні ўсе жадаючыя мелі магчымасць змераць свой артэрыяльны ціск і вызначыць фактары рызыкі развіцця артэрыяльнай гіпертэнзіі. Па прад’яўленню талонаў удзельнікаў акцыі людзям прадастаўлялася магчымасць кансультацыі ўрача-кардыёлага і ўрача-тэрапеўта ў паліклінічным аддзяленні.
“Такія акцыі прыносяць вялікую карысць людзям, асабліва тым, хто мае праблемы са здароўем. Не сакрэт, што далёка не ўсе з нас своечасова звяртаюцца за ўрачэбнай дапамогай”, — упэўнены жыхар гарадскога пасёлка Вячаслаў Мар’янавіч Пяткун, які таксама прыняў удзел у медыцынска-асветніцкай акцыі, што праводзілася 19 красавіка ў будынку аўтавакзала. Дарэчы, гэта адно з тых месцаў, дзе акцыя праходзіла вельмі ажыўлена, людзі з задавальненнем звярталіся да медыкаў — фельчара Антаніны Іванаўны Вілманс і медыцынскай сястры Марыны Альбертаўны Андрэевай.
Праверыць стан свайго здароўя можна было і ў фае райвыканкама. Там медыцынскія паслугі насельніцтву аказвалі ўрач-інтэрн Святлана Васільеўна Лутохіна і медыцынская сястра Людміла Іванаўна Блажэвіч.
Акцыя, безумоўна, патрэбна. У першую чаргу таму, што сардэчна-сасудзістыя захворванні па-ранейшаму з’яўляюцца аднымі з самых небяспечных і распаўсюджаных хвароб сучаснасці.
Вольга СТАШЭЎСКАЯ.
