У першую нядзелю снежня ў нашай краіне адзначаюць сваё прафесійнае свята юрысты. Гэта свята аб’ядноўвае спецыялістаў па юрыспрудэнцыі, адвакатаў і пракурораў, следчых і натарыусаў, суддзяў і юрысконсультаў, усіх тых, хто служыць закону, праўдзе і справядлівасці. На гэтых людзей ускладзена задача па фарміраванні прававой культуры і павагі да закона.
Старшыня суда Шаркаўшчынскага раёна Васілій Міхайлавіч Бярозкін напярэдадні свята ва ўрачыстай атмасферы павіншаваў калектыў падначаленых супрацоўнікаў, выказаў ім словы ўдзячнасці за сумленную і бездакорную працу.
15 год назад, 1 снежня 2004 года, Васілій Міхайлавіч быў прызначаны на пасаду старшыні суда Шаркаўшчынскага раёна. За гады работы Васілій Міхайлавіч заслужыў павагу і аўтарытэт у грамадстве. Праца старшыні суда адзначана шматлікімі ўзнагародамі, а 29 лістапада яму ўручана Ганаровая грамата Шаркаўшчынскага раённага Савета дэпутатаў.
Павіншаваць старшыню суда і калектыў супрацоўнікаў установы ў той дзень завіталі пракурор Шаркаўшчынскага раёна А. Б. Вецюгоў, начальнік РАУС С. М. Арэшкаў, начальнік раённага аддзела следчага камітэта Ю. В. Кавалёнак, начальнік раённага аддзялення Дэпартамента аховы В. В. Марозаў і начальнік РАНС А. М. Федуковіч. Прадстаўнікі сілавых ведамстваў пажадалі сваім калегам-юрыстам трывалага здароўя, прафесійнага росту, дабрабыту ў сем’ях.
Сяргей РАЙЧОНАК.
