Навейшыя сродкі малой механізацыі, якія ўсё часцей прымяняюць работнікі камунальных служб, значна спрошчваюць працу, змяншаюць затрачаны час на розных відах работ.
Па папярэдняй дамоўленасці паміж Шаркаўшчынскім УКП ЖКГ і глыбоцкай камунальнай службай на працягу некалькіх дзён у нашым гарадскім пасёлку працаваў незвычайны агрэгат — ручны фрэзерны здрабняльнік пнёў і карэння дрэў.
— Тэхніка прымяняецца для рэзкі надземнай і падземнай часткі пнёў, — тлумачыць дырэктар УКП ЖКГ Аляксей Клакоўскі. — Здрабняльнік аснашчаны паваротным механізмам, а аўтаматычная фіксацыя рухомай верхняй канструкцыі істотна аблягчае працу аператара.
Побач са шматкватэрным домам па вуліцы Горкага, што ў мікрарёне будаўнікоў, работнік Глыбоцкага УКП ЖКГ Сяргей Пашковіч займаўся здрабненнем пня ад папярэдне спілаванага дрэва. У хуткім часе па просьбе мясцовых жыхароў на гэтым месцы будзе пашырана аўтамабільная пляцоўка.
Сяргей РАЙЧОНАК, фота аўтара.