На мінулым тыдні ў нашым гарадскім пасёлку прайшоў семінар-вучоба для намеснікаў кіраўнікоў па ідэалагічнай рабоце і спецыялістаў, адказных за ідэалагічную работу ў калектывах. Правяла мерапрыемства начальнік аддзела ідэалагічнай работы, культуры і па справах моладзі райвыканкама Людміла Уладзіміраўна Стома. У рабоце семінара таксама прынялі ўдзел кіраўнікі раённых структур КПБ, раённага камітэта ГА “БРСМ”, ветэранскай і прафсаюзнай арганізацый, сакратары пярвічных арганізацый і актыў РК ГА “БРСМ”.
Напачатку семінара-вучобы аўдыторыі быў прадэманстраваны фільм, падрыхтаваны Федэрацыяй прафсаюзаў Беларусі, які змяшчае асноўныя, найбольш значныя моманты 5 Усебеларускага народнага сходу. З асноўным пытаннем, разгледжаным на мерапрыемстве, “Аб падрыхтоўцы і правядзенні выбараў дэпутатаў Палаты прадстаўнікоў Нацыянальнага сходу Рэспублікі Беларусь шостага склікання. Агітацыйная работа” выступіла начальнік аддзела ідэалагічнай работы, культуры і па справах моладзі райвыканкама Людміла Уладзіміраўна Стома. Падчас свайго выступлення яна паведаміла, што па Пастаўскай выбарчай акрузе № 29 (у склад якой уваходзіць і тэрыторыя Шаркаўшчынскага раёна) зарэгістраваны 3 кандыдаты ў дэпутаты Палаты прадстаўнікоў Нацыянальнага сходу Рэспублікі Беларусь шостага склікання: Сяргей Рычардавіч Зямчонак, Віктар Віктаравіч Карыбут-Дашкевіч і Дзмітрый Уладзіміравіч Танана. Такое рашэнне было прынята 10 жніўня на пасяджэнні акружной выбарчай камісіі. Людміла Уладзіміраўна пазнаёміла прысутных з кароткімі аўтабіяграфічнымі звесткамі ўсіх кандыдатаў у дэпутаты. Намеснік галоўнага ўрача Шаркаўшчынскай ЦРБ і першы сакратар раённага камітэта Камуністычнай партыі Беларусі Мікалай Валянцінавіч Манкевіч выступіў з пытаннем “Аб выбары дэпутата Палаты прадстаўнікоў Нацыянальнага сходу Рэспублікі Беларусь шостага склікання па Пастаўскай выбарчай акрузе № 29”. На адным з пасяджэнняў, падчас вылучэння кандыдатаў у дэпутаты, працоўны калектыў установы аховы здароўя “Шаркаўшчынская ЦРБ” вылучыў у склад кандыдатаў у дэпутаты Палаты прадстаўнікоў Нацыянальнага сходу Рэспублікі Беларусь шостага склікання кандыдатуру Сяргея Рычардавіча Зямчонка, які ў цяперашні час займае пасаду дырэктара адкрытага акцыянернага таварыства “Паставымэбля”. Мікалай Валянцінавіч больш падрабязна пазнаёміў прысутных з біяграфіяй і дзейнасцю гэтага чалавека, яго планамі ў выпадку, калі выбаршчыкі падтрымаюць кандыдатуру С. Р. Зямчонка на выбарах.
Аб праекце “Адкрыты дыялог” грамадскага аб’яднання “Беларускі рэспубліканскі саюз моладзі” расказала першы сакратар райкама БРСМ Юлія Леанідаўна Протас.
— Гэты праект паспяхова стартаваў у краіне як шырокая дыскусійная пляцоўка, — адзначыла яна, — якая дае магчымасць моладзі ўздымаць самыя вострыя праблемы і найбольш хвалюючыя пытанні перад прадстаўнікамі органаў улады, палітыкамі, прадпрымальнікамі, прадстаўнікамі розных прафесій і сфер дзейнасці. Спадзяёмся, “адкрытыя дыялогі” стануць традыцыйнымі і ў нашым раёне.
“Аб вылучэнні назіральнікаў на ўчасткі для галасавання і іх рабоце” паведамілі начальнік аддзела ідэалагічнай работы, культуры і па справах моладзі райвыканкама Людміла Уладзіміраўна Стома і старшыня раённага аб’яднання прафсаюзаў Ігар Віктаравіч Малюгін.
“Аб актывізацыі работы пярвічных ветэранскіх арганізацый” — тэма выступлення старшыні раённай ветэранскай арганізацыі Галіны Мікалаеўны Філатавай.
“Аб маніторынгу стану ідэалагічнай работы ў працоўных калектывах Шаркаўшчынскага раёна” расказала галоўны спецыяліст аддзела ідэалагічнай работы, культуры і па справах моладзі райвыканкама Тэрэса Эдвардаўна Міштоўт.
Гэтыя і некаторыя іншыя актуальныя для нашага рэгіёну пытанні былі разгледжаны падчас семінара-вучобы з намеснікамі кіраўнікоў і спецыялістамі, адказнымі за ідэалагічную работу ў калектывах 12 жніўня.
Вольга ЧАРНЯЎСКАЯ